BÀNARI. In intro de sas tzelebratziones de “Sa Die de sa Sardigna” e de sas manifestatziones a pitzu de sas figuras protagonistas de s'istòria e de sa cultura sarda, s'amministratzione comunale e sa cooperativa sotziale Ypnos ammàniant pro su 24 de maju e pro su 7 de làmpadas duos addòbios (ambos duos a sas 6 de borta de die in su Palatu Solinas) ammentende Juanne Maria Angioy e Gràtzia Deledda. Su 24, a pustis de sos saludos de s'amministratzione e de s'introduida de Maria Vitòria Porcu de sa cooperativa Ypnos, sos acòrdios vocales de “su Cuncordu banaresu” ant a acumpangiare sa presentada de su traballu (chi s'at a acumprire oe cun sa realizatzione de unu murale) chi est bidende protagonistas sos pitzocos de sas iscola mèdias e chi est intituladu “Su tretu de Angioy”. In sa matessi die, ma finas in s'imbeniente de su 7 de làmpadas, s'ant a pòdere iscurtare sos contos “de coghina” de Gràtzia Deledda cun sas leturas de unas cantas pàginas de sas òperas suas bortadas in sardu pro s'ocasione. At a èssere presente s'autora de su libru “A tavola con Grazia” Neria De Giovanni, presidente de s'Assòtziu internatzionale de sos crìticos literàrios.