Lunis, die de crònaca isportiva cun sa bìnchida de su Cagliari contra a s'Inter. Sas bator retes de sos rujos-biaitos de Zeman comintzant a fàghere a bisare sos tifosos de s'iscuadra casteddaja de fùbalu, finas a como pagu brillante. Pro La Nuova «Super Cagliari, Inter istrombulada. Tripleta de Ekdal e rete de Sau. Zeman: “Nat-chi nche fìamus giai falados”». Gasi imbetzes L'Unione Sarda: «Unu Cagliari fantàsticu umìliat s'Inter in Santu Siru. Istòricu 4-1 a s'iscuadra de Mazzarri: aberit Sau, tris de Ekdal». Su diretore Muroni firmat s'editoriale «A in ue si andat cun Zeman?» cun unu meledu in pitzu de sos umores de sos amantiosos chi («francu sa fide mala a rùere de sa Curva Nord») aiant pèrdidu cale si siat ispera: «in su paisu de sos 60 milliones de allenadores (su fùbalu, Ndr) est galu passione irratzionale ma finas derrotismu redossu». La Nuova aberit però cun un'àtera crònaca “isportiva”: «Iscatat s'alt a sos contributos a s'isport. Su cummissàriu de Sardegna Promozione arreat sos pagamentos erogados a sas sotziedades pro su 2013. Sos annotos de sa Corte de sos contos ponent oriolu. Regione: s'impignu abarrat, francu illegitimidade».