«Meridiana, tzinesos prontos a investire». Sa nova chi est essida a campu in sos notitziàrios de eris cumparet oe a maduru in s'editzione de La Nuova Sardegna cunfirmende s'intentzione de su fundu Pingji Shanghai chi, in Itàlia, aiat giai achistadu sa sotziedade de Fùbalu de su Pavia: «sa cumpangia nos interessat».

Ma si sos duos operajos, sos chi sunt protestende in subra de unu palu, ant retzidu sa telefonada de Scaramella, àteros ant retzidu sos manganellos de sa politzia: «Corteu, iscontros e oto fertos: sa Fiom acusat su guvernu».

Custa nova de importu "natzionale" si crobat (in sa matessi colunna) cun s'editoriale de Luciano Marrocu in pitzu de sa "manca Pd" chi diat chèrrere torrare a sos tempos de Bersani. Sa destra de su Pd imbetzes est in s'editoriale de Giacomo Serra in L'Unione chi faeddat de «bentènniu renzianu».

Torrende in logu sardu La Nuova nos contat de su pranu Matrica chi (l'at naradu Pigliaru): «andat a in antis sena impèigos» e de su protzessu pro s'incuinamentu in su Sartu de Chirra («Sa Regione contra a sos generales: "nois parte tzivile"»). Incuinamentu finas in s'Omodeo: «Unu lagu-polìgonu cun mìgias de boetes»