Bonu comintzu de chida a totus cantos...chi sas butzacas nostras giai sunt mannas! A su nessi gasi l'ant a pensare in Abbanoa e in su Guvernu. Ischimus giai chi b'at de pagare una cautzione de prus de 55 èuros. Acò, in su tìtulu mannu de La Nuova s'ente chi gestit su servìtziu ìdricu narat chi est petzi una medida «contra a sos morosos». Ma non semus totus morosos, e tando, semper in La Nuova amus sa risposta de s'avocadu Dore: «Penalizat sos utentes. Integratzione illegìtima». Pro su chi pertocat su Guvernu in L'Unione podimus lèghere in pitzu de sa "local tax" de Renzi chi at a pònnere paris s'Imu cun sa Tasi e àteros tributos locales (non bastaiat sa Iuc chi, a su nessi, fiat in italianu?). Pro su presidente de s'Anci sarda Pier Sandro Scano «s'arriscu est de iscarrigare in palas de sas comunas un'àteru ismànniu de sa fiscalidade».
E si in su bilàntziu regionale de su 2015 mancant «550 milliones»? Pro La Nuova b'est sa possibilidade chi sa Giunta sigat a minimare sas resursas «si cheret àere unu màrgine mìnimu pro sos investimentos».