Partecipa a MeiloguNotizie.net

Sei già registrato? Accedi

Password dimenticata? Recuperala

Bonorva, su bandu de sa XXI editzione de su "Prémiu Paulicu Mossa"

Condividi su:

Prémiu de Literadura "Paulicu Mossa", editzione XXI dedicata a sos deghe annos dae sa morte de Peppe Sozu. Sas òperas podent arrivare fintzas a su 16 de Santandria de su 2018.

BANDU E REGOLAMENTU

Art. 1
Pro s’annualidade 2018 bandimus sa XXI editzione de su Prémiu Paulicu Mossa, cuncursu de literadura in limba sarda. Custa editzione si faghet a sos deghe annos dae sa morte de Peppe Sozu.

Art. 2
Sas òperas in gara, galu a èssere imprentadas, publicadas in Internet e premiadas in àteros cuncursos, podent arrivare fintzas a su 16 de Santandria de su 2018.

Art. 3
Sunt ammissas a su Prémiu sas òperas iscritas in sardu (calesisiat variedade) e in sas àteras limbas de Sardigna; pro sas òperas in tabarchinu e in saligheresu est agradèssida sa tradutzione in sardu.

Art. 4
Sos tribàglios podent arrivare in duas maneras:
a) postos in intro de una busta in d-una còpia ebbia. Sas generalidades, s’indiritzu e su nùmeru de telèfonu de s’autore devent èssere iscritos in su matessi fògliu.
Sa busta cheret imbiada a:
SEGRETERIA DE SU PRÉMIU DE LITERADURA PAULICU MOSSA
COMUNE DE BONORVA - ASSESSORADU DE SA CULTURA
PIATA DE SANTA MARIA, 27 - 07012 BONORVA SS
b) via E-mail imbiende·los a s’indiritzu de su Prémiu chi est paulicu.mossa@tiscali.it. Sas generalidades, s’indiritzu e su nùmeru de telèfonu de s’autore devent èssere iscritos in sa matessi E-mail.

Art. 5
Su Prémiu de Literadura Paulicu Mossa est divisu in bator setziones, onzuna dedicada a unu bonorvesu chi at dadu mannesa a sa limba e a sa literadura de Sardigna:
• Peppe Sozu – Poesias in rima, Cantones e Modas
• Anghelu Dettori – Poesias chentza rima
• Tore Tedde – Prosa
• Antoni Sanna – Pìulos

Setzione Peppe Sozu (a tema impostu) – POESIAS IN RIMA, CANTONES e MODAS
Onzi cuncurrente podet imbiare una poesia in rima o una cantone o una moda a tema impostu “Peppe Sozu e sa poesia a bolu”. Pro sas poesias e sas cantones si recumandat de s’atènnere a su lìmite de sos barantaduos versos. Pro sas modas, custas devent essere cumpostas segundu sas règulas de custos modellos: un’istèrrida e tres fiores, de una longària de 12, 14 o 16 versos, siat pro s’istèrrida e siat pro sos fiores, o puramente in sos modellos pius afinigados comente cumpostura, tipu sas cumposisciones de Pitanu Morete e Pedru Caria connotas comente 36 e/o 37 retrogadu, fioridu e tentu a maglia; su chi importat est chi su cuncurrente rispetet in totu sas partes de sa moda sua sa longària seberada dae isse mattessi. In fora de sa busta, o in su “oggetto” de sa E-mail, bi devet èssere iscritu Setzione Peppe Sozu.

Setzione Anghelu Dettori – POESIAS CHENTZA RIMA
Onzi cuncurrente podet imbiare una poesia chentza rima in calesisiat argumentu. Si recumandat de s’atènnere a su lìmite de sos barantaduos versos. In fora de sa busta, o in su “oggetto” de sa E-mail, bi devet èssere iscritu Setzione Anghelu Dettori.

Setzione Tore Tedde – PROSA
Onzi cuncurrente podet imbiare unu contu o una noedda o una paristòria o unu calesisiat branu de prosa de naronzu in calesisiat argumentu; sas òperas si deven atènnere a su lìmite de sos ses foglios; sa còpia devet èssere pintzada. In fora de sa busta, o in su “oggetto” de sa E-mail, bi devet èssere iscritu Setzione Tore Tedde.

Setzione Antoni Sanna – PIULOS
Onzi cuncurrente podet imbiare unu componimentu chi potet essere una poesia, unu dìciu, una màssima, un’aforisma, subra calesisiat argumentu e in sa forma de sos pìulos de Twitter, est a nàrrere cun su lìmite de sos 280 carateres ebbia. In fora de sa busta, o in su “oggetto” de sa E-mail, bi devet èssere iscritu Setzione Antoni Sanna.

Art. 6
Onzi autore podet presentare un’òpera ebbia pro setzione.

Art. 7
Sas òperas no las amus a torrare a sos autores e s’Assótziu culturale Prémiu de Literadura Paulicu Mossa si reservat onzi diritu de las publicare chentza, pro custu, dèvere carchi cosa a sos autores.

Art. 8
Su giudìsciu de sa Giuria est insindacàbile.

Art. 9
Sa premiatzione s’at a fàghere in su mese de Nadale de su 2018. Solu chie binchet o est mentzionadu dae sa Giuria at a èssere avvisadu.

Art. 10
Sos prémios de su Cuncursu sunt cosas fatas in Sardigna dae mastros artijanos.

Art. 11
Sa partecipatzione est a s’indonu; chie bi pigat parte atzetat su Regolamentu.

Art. 12
Sos autores premiados cun su Primu Prémiu podent torrare a bìnchere in cussa setzione a pustis de tres editiones.

Art. 13
Sa Giuria de sa XXI editzione de su Prémiu Paulicu Mossa est cumposta dae:
Antoninu Rubattu (presidente), Clara Farina, Tore Marruncheddu, Angelo Sotgiu, Mauro Piredda, Francesco Falchi (segretariu)

Bonorva, su 8 de Cabidanni de su 2018

Condividi su:

Seguici su Facebook