BESSUDE. Sa Pro Loco, cun su patrotzìniu de sas amministratziones comunale, provintziale e regionale, organizat pro martis chi benit, su 12 de austu, sa de deghe editziones de sa “Sagra de sos Ciciones e de sa Mendula bellinda”. Sos “ciciones” bessudesos, fatos a manu pro mèdiu de sos chilìrios, sunt prus minores dae sos àteros cicioneddos sardos.
Su protzedimentu est contivizosu a beru: sos espertos bi ponent a su nessu 5-6 oras pro nde produire unu chilu.
Sa “mendula bellinda” est imbetzes su durche tìpicu bessudesu: sas mendulas turradas in su furru a linna sunt incapadas cun tùcaru e bùcia de limone.
Sa manifestatzione at a comintzare a oras de sas 7,30 de sero cun sa mustra de s'ammàniu de sos ciciones. A sas 8,30 s'ant a pòdere assazare bator màndigos a base de ciciones (duos sighende sa traditzione) e sa mendula. No at a mancare sa musica de sos “Cremisi” e, in intro de sa sagra, s'at a pòdere visitare sa mustra “Trastes antigos” in “Sa Domo de sas Damas”.