SÌLIGO. Finas ocannu sa bidda de tziu Gavinu Còntene e de Maria Carta at a retzire sos amantiosos de unu de sos produtos prus nòdidos de su territòriu nostru: sa sartitza ammaniada sighende sa traditzionale retzeta silighesa (sale, pìbere, colovru, anis, nughe muscada, àgiu ischitzadu in s'abba e afumadura).
Sa de trintachimbe editziones de sa “Festa de sa sartitza e de su binu”, organizada dae sa Pro Loco, at a comintzare sàbadu su 6 de nadale cun s'abertura de sos ispàtzios espositivos (dae sas 3 de borta e die) e cun sos colores, sos sonos e sos cantos peri sa bidda de su grupu folk Zeppara de Tàtari e de su Cunsonu Nostra Segnora de Seunis de Tiesi.
Sos nuscos e sos sabores ant a sighire s'in cras dae sas 10 de mangianu. A sa matessi ora at a comintzare sa de bator editziones de sa “CorSalsiccia”. A sas tres de merie mùsica peri sas carreras silighesas cun sa chiterra de Fabrizio Bandinu, su sonete de Giansilvio Pinna, sa boghe de Carlo Crisponi e s'abilidade de Giacomo Longoni chi at a sonare prus de un'istrumentu. S'ant a esibire finas sas caratzas traditzionales “Sonaggios e s'Urzu” de Ortueri e sos cantadores a chiterra Francesco Fais e Franco Figos acumpangiados dae Giuseppe Murru.