Custu mangianu sos cussigeris de iRS, Partito dei sardi e Rossomori ant ammaniadu una cunferèntzia pro acrarire sa positzione issoro a pitzu de sa crisi in sa tula de Gaza. Moende dae sa solidariedade a su pòpulu palestinesu, sos sovranistas ant leadu positzione a pitzu de s'impreu de sas bases e de sos polìgonos sardos in ue si esèrtzitant sas fortzas armadas israelianas. Ant faeddadu finas sos cussigeris de su Meilogu Gavino Sale e Pier Mario Manca.

Sale at pedidu iscusa a sos palestinesos ca «sas armas impreadas in sa tula de Gaza sunt istadas isperimentadas in Sardigna contra a sa voluntade nostra», Pro su cabu de iRS est pretzisu de «torrare a cuntratare cun s'istadu italianu su pesu de sas tzerachias militares» e de «impedire s'ismanniamentu de sas atividades in intro de sos polìgonos gasi comente prevìdidu dae su pianu de su ministeru de sa Difesa de su 2009».

Pro Manca tocat de nche barigare sa solidariedade formale e de pònnere a dispositzione sos ospidales sardos pro curare sos pitzinnos palestinesos. «Non b'at a èssere paghe – at concruidu Manca – sena su reconnoschimentu de duos istados e duas natziones».