Luisi Sanna, nàschidu in Abbasanta s'8 de santandria de su 1939, est su candidadu de su Movimentu Zona franca. Laureadu in Lìteras e Archeologia at insegnadu latinu e gregu in su litzeu “De Castro” de Aristanis. In sa matessi tzitade at fatu su cussigeri comunale (dae su 1981 a su 1995) e finas su vitze sìndigu (dae su 1989 a su 1990). Dae su 1987 a su 1990 est istadu finas cussigeri de amministratzione de sa Sfirs, sa finantziària regionale. Curret cun una lista ebbia, indipendente dae sas coalitziones mannas, in porfia cun àteros “zonafranchistas” chi, imbetzes, ant seberadu de istare in intro de su tzentru destra.
Pro Sanna sa zona franca integrale est sa solutzione a pustis de «barant'annos de polìticas econòmicas chi ant creadu petzi depressione pro sa Sardigna». Sa proposta est acumpangiada dae sa netzessidade de àere una Agentzia sarda de sas intradas pro contare, collire e costoire sos tributos. Insertare, duncas, sa Sardigna in su còdighe doganale comunitàriu comente chi esseret territòriu extradoganale.
Ma su programma de su movimentu non pertocat petzi sa fiscalidade. S'amparu e s'avaloramentu de s'identidade sarda devent èssere bogados dae s'amministratzione tzentrale; su turismu devet èssere sustenìbile; s'ètica devet èssere posta in antis de totu istesiende sos polìticos dae s'amministratzione de sa sanidade. Ma finas continuidade territoriale, formatzione, gherra a sa povertade e infrastruturas.