Resèssida manna pro sa prima parte de sa rassigna “Immagini, suoni, parole”, concruida in su fine chida coladu. Zente meda sa chi est acudida a sa presentatzione de su film “L'Arbitro”, una pellìcula produida dae s'Istituto etnografico chi, nàschida dae su cortometràgiu originàriu, est regollende sos giudìtzios positivos de pùblicu e de crìtica gràtzias a unos cantos sèberos chi l'ant resa ùnica in sas produtziones atuales. Benito Urgu e Jacopo Cullin si sunt tratesos cun sa zente e ant rispostu a sas preguntas sena renuntziare a sos momentos de risu chi non podent mancare in presèntzia de duos personàgios che a issos.
Momentos de meledu cun sa presentatzione de su libru de Ottavio Olita, “Codice libellula: la verità negata”, cun unas cantas pàginas lèghidas dae Lia Careddu acumpangiada dae Davide Mocci cun sa chiterra. Olita, cun su professore Silvano Tagliagambe, ant sutalineadu, finas faeddende de “istadu assente”, s'importàntzia de una rassigna che a custa e sa netzessidade de una re-nàschida culturale, a comintzare dae sa Sardigna, pro avalorare totu su chi amus e pro vìvere mezus in su tempus benidore.
Cun sa proietzione de “Il solito ignoto: vita acrobatica di Tiberio Murgia” e cun sa dibata intre su regista Sergio Naitza e su pùblicu nde sunt bessidas a campu sas aventuras artìsticas e finas sentimentales de s'atore sardu.
Sa rassigna s'at a concruire cun sos apuntamentos de chenàura e sàpadu cun sos pitzinnos de sas elementares e sas pellìculas western.
Inoghe su programma intreu
Inoghe un'artìculu pro sa pellìcula “Quella sporca sacca nera”