BORUTA. Est comintzadu domìniga su 15 su cuncursu “Unu disìgiu pro Nadale” ordingiadu dae s'assòtziu culturale “Àndala Noa”. Pro leare parte a su cuncursu, sos interessados si nche devent iscrìere in su situ internet de s'assòtziu e intrare in sa pàgina ufitziale de su cuncursu prenande su mòdulu in lìnia cun totus sos datos rechèdidos. Pro pòdere bìnchere, sos iscritos a su cuncursu “Unu disìgiu pro Nadale” ant a dèvere iscrìere su disìgiu issoro pro Nadale in sardu. Totus sos disìgios ant a èssere votados dae sos impitadores de su situ de s'assòtziu. Su chi at a retzire prus votos at a bìnchere unu abbonamentu a sa rivista de cultura sarda “Làcanas” pro su 2014.«Àndala noa – comente si leghet in su regulamentu - no at a leare a cunsideru sas faddinas chi pertocant sa grammàtica sarda… mancari siat mègius a no nde fàghere». S'at a pòdere iscrìere su disìgiu finas a su 25.