TIESI. Totu prontu pro “A cunsonu”, su primu addòbiu de sos bintoto ordingiados dae su “Sòtziu Tenores Sardigna” chi s'ant a tènnere dae inoghe a su 31 de maju.
Chenàbura su 7 de custu mese, sa manifestatzione at a comintzare a sas 11 de mangianu in sa sala de s'Istitùtu tècnicu cummertziale cun su “laboratòriu de tenore” chi at a bìdere sa presèntzia de su “Cunsonu Santu Juanne” e de sos dischentes de s'iscola.
A borta de die (a sas 17,30) in sa sala de sa crèsia de Santa Rughe s'at a tènnere imbetzes sa cunferèntzia “Tenore e cuncordu, chistiones de modas e de limba”: introduida dae sos saludos de su presidente de su sòtziu Sarvadore Ghisu e de Gavinu Chìghine (de su cunsonu “Santu Juanne”), at a èssere arrichida dae sas relatas de Bustianu Pilosu e Marco Lutzu de su Cunservatòriu de Casteddu.
A sas 19,30 ant a cantare, paris a sos meres de domo, su “Tenore Remunnu 'e Locu” de Bitzi, su “Tenore Santu Gavinu” de Illorai, su “Tenore durgalesu”e su “Cuncordu Ospitone” de Ollollai.