TIESI. Sa mègius fotografia e sa mègius iscena de atzione. Custos sos duos reconnoschimentos otènnidos in su “Roma Web Festival 2014” dae “Quella sporca sacca nera”, sa sèrie western iscrita e dirìgida dae su regista ogiastrinu Mauro Aragoni. Ambientada in su Mèssicu de su 1895 e girada in Sardigna, sa sèrie si cumponet de bator partes: “Terra di confine”, “Prigioniero”, “Segreti” e “Questione di soldi”. Duellos e concas segadas s'acrobant bene meda cun su paesàgiu boghende·nde a campu una pellìcula in ue agatamus sas influèntzias de Leone e de Tarantino, ma finas grande professionalidade. De importu sas mùsicas de Antonio Manca, giòvanu cumponidore de Tiesi, sa bidda chi, luego, at a proietare sa sèrie in sa de tres editziones de sa rassegna tzinematogràfica “Immagini, suoni, parole”, organizada dae sa Comuna.