Sàpadu su 6 de nadale, Nino Fadda at a presentare in Tiesi s'ùrtimu libru sou, Incantu, una regorta de poesias chi nos agiuant a connòschere sa vida intrea de s'autore e de sa comunidade tiesina. A s'initziativa ant collaboradu s'Amministratzione comunale, sa Pro Loco, s'Assòtziu Seunis e su Cunsonu tiesinu.

Dae unos cantos annos Nino Fadda est nòdidu che a romanzieri in limba sarda; finas a como, a pustis de s'esòrdiu in su 2000 cun “Carrela de putu”, nd'at publicadu 7: s'ùrtimu, in su 2012, “De Capocota… e rodinos”.

Comente podimus bìdere dae custu libru nou, sa poesia est istada s'àtera passione manna de Fadda. No est de badas chi dae paritzos annos boddat cunsensos, aprètzios e prèmios in sa mazore parte de sos cuncursos literàrios sardos.

Su libru est arrichidu e acumpanzadu dae unu Cd realizadu cun su cuntributu de su Cunsonu tiesinu chi at cantadu unos cantos versos presentes in su volùmene sutalineende, gai, su ligàmene mannu intre sa poesia sarda traditzionale e su cantu a tenore (a cunsonu, a sa tiesina).

Su tìtulu de su libru nos acrarit, finas gràtzias a sa presèntzia de su Cd, su significu dòpiu de cantu, ma finas de incantu. Incantu de sa natura, de sa galania ma finas de sos raportos umanos fungudos chi atraessant sa vida de ognunu de nois. Su libru est unu viàgiu a s'imbesse in su tempus; movet dae sa vida de ogni die e dae s'atualidade pro indagare finas a fundu in sas raighinas de sa bidda nadia, lassada essende giòvanu pro chircare traballu, e permitit de torrare a iscobèrrere ligàmenes, afetos e istòrias.

A sa presentatzione de su libru, a pustis de sos saludos de sas autoridades, in prus de s'autore ant a intervènnere Istèvene Ruiu, Clara Farina (chi at a lèghere  unos cantos versos de su libru) e su Cunsonu tiesinu (chi nd'at a cantare àteros). S'apuntamentu est a sas 5 de merie in su salone de su Museu Sassu.