GORÌTZIA. Chenàbura su 20 de martzu sas terras miteleuropeas de su chirru de Gorìtzia, in ue s'ammesturant sas culturas latina, germànica e islava, ant a abratzare sa traditzione sarda e sa mùsica de Maria Carta. Sa cantante silighesa, chi in sa vida sua at barigadu làcanas geogràficas e artìsticas, at a èssere ammentada in s'eventu “Gorizia e Sassari nel nome di Maria Carta” ammaniadu dae sa Fundatzione a issa intitulada (paris cun àteros entes patrotzinantes). A sas 18 sos saludos istitutzionales ant a abèrrere sas esibitziones de su coro “Maria Carta” de s'iscola mèdia n°3 de Tàtari, de s'orchestra de s'isclola mèdia “A. G. Mura” de Bono, de Radio Zastava, de Andrea Pisu (Launeddas) e Vanni Masala (Organetto) , de su Grupu vocale feminile “Bodeča Neža” , de su coro giovanile “Free Voices” e (a sas 20) de sos Bertas.