BORUTA. Su beranu est a proa a si nch'intrare. E tando su comitadu Santu Pedru de Sorres (cun s'agiudu de sa Comuna e sa collaboratzione de sa coop Sardegna 2000) at detzisu de li fàghere sa festa.
“La festa di Primavera” at a comintzare chenàbura su 20 de martzu a sas 7 de merie cun unu cunvegnu in subra de s'anniversàriu de sa prima gara a chiterra pagada chi, chentu annos a como s'est acumprida in sa bidda borutesa. Ant a faeddare s' espertu Antonio Caria (bunnannaresu) e su fraigadore de chiterras sardas Nino di Volo. At a leare parte a s'addòbiu finas Mario Mannu. A sas 9 at a sighire sa gara cun sos cantadores Franco Denanni, Tarangelo Salis e Daniele Giallara, acumpangiados cun sa chiterra dae Pietro Nieddu.
S'incràs, dae sas 3 de merie, b'at a àere una bìsita ghiada “alla scoperta dei monumenti e dei siti culturali di Borutta”: sa Catedrale e su Museu de Santu Pedru de Sorres, sos furraghes. No at a mancare unu laboratòriu pro connòschere su mundu de sos tzintzirriolos de Roca Ulari. S'ant a pòdere finas ammirare sos murales de Pina Monne e sa crèsia de Santa Rughe.
A sas 6, in sa corte de sas chi fiant sas iscolas elementares, at a èssere ammaniada una mustra-mercadu a incuru de sos hobbistas e colletzionistas de s'Ulumedu. Ant a èssere espostos libros, màchinas pro iscrìere e pro cosire, discos in vinile , tzeràmicas e àteru.
A sas 8 sa chena cun cicioneddos cun bagna de porcrabu, porcrabu “alla cacciatora”, binu, abba e durches. Sos concruos cun giogos e ballos ghiados dae Fabio e Bianca de s'assòtziu “Mosbi animazione”.
Pro info e prenotatziones 3711549872. Custas sas cuotas (francu pro sos pitzinnos) pro leare parte a sas bìsitas e a sa chena: mannos 10 èuros; pitzocos dae sos 11 a sos 15 annos 3 èuros.