Foto-notìtzia de importu (in La Nuova Sardegna) pro su destinu de sos operajos de su trasportu aèreu sardu. «Manifestatziones in sas carreras de Terranoa e posca assemblea de sos traballadores. Sos dipendentes Meridiana in corteu: nos devent sarvare totus». In intro de su giornale sa boghe issoro: «Non cherimus s'iscontu, amus a andare a s'iscontru. Est una partida: o la binchimus o la perdimus. Su parègiu non serbit. E duncas, o nos litzèntziant totus cantos o nos mantenent totus cantos». Sa proposta de sa Cgil: «duos annos de cassa integratzione, una cumpangia ùnica intre Meridiana e Air Italy (achistada dae Meridiana S.p.a a su 100% in su 2013, Ndr), una lista ùnica pro sos traballadores de sos duos vetores, unu pranu de ripresa, o puru unu propietàriu nou». Est a bìdere chie est interessadu – semper chi Meridiana chèrgiat lassare – a dae chi in sa matessi pàgina leghimus «Si nch'istèsiat s'ipòtesi de su sòtziu. Su Qatar no est interessadu».

S'istadu àrabu in prima pàgina pro àteras chistiones: «S. Rafaelle, su disafiu subra sa sede. Terranoa, su sìndigu a su Qatar: “Si serbit, sas àreas pro la fraigare a nou bi sunt”».

Torrende a sa mobilidade aèrea L'Unione sarda aberit oe cun unos cantos datos: «In 14 annos Ryanair at fatu arribare in s'Ìsula 17 milliones de turistas». Galu: «“Sas Low cost? Istratègicas”. Pigliaru impignat sa Giunta, s'assessore Deiana si adèguat». «Eris in Bruxelles – leghimus – sas tratativas pro sa protzedura de infratzione chi arreat su bandu pro sos collegamentos de sa continuidade territoriale 2». Dae sa pregunta a sos letores (posta eris in s'editzione in lìnia) bidimus in prima pàgina su pàrrere favorèvole (86%) a su sustegnu regionale (e finas dae parte de sas sotziedades de gestione de sos aeroportos) pro sas cumpangias a preju bassu (low cost, in italianu).

Ambos duos sos giornales ponent oe in evidèntzia sos isvilupos de su protzessu in pitzu de su delitu Dore de Gavoi.

La Nuova lassat a manca su tretu pro unas cantas novas de importu: «Pranu domo, martis in Giunta sa lege noa»; «Abbanoa: belle 500 milliones pro megiorare sa rete ìdrica»; «Regione acusat s'istadu. Votu unànime: vertèntzia intradas a in antis cun sos recursos»; «Coldiretti a sa gherra de su late».