Salude a totus. Oe leghende La Nuova Sardegna bidimus chi su verbu chi dòminat in sa prima pàgina est “torrare”: in Cabu Frasca si torrat a isparare; in Gènova torrat a mòrrere gente pro more de s'abba; torrat su pranu paesagìsticu de Soru a segus de sa burrada de su Pps de Cappellacci; in s'Asinara diant dèvere torrare sos detenudos. L'Unione sighit cun su «siddadeddu anti-crisi» de 32 milliardos mentovadu in s'editzione de eris. E annanghet: «sa Giunta at aprovadu su disegnu de lege chi at a istabilizare sa possibilidade de ismanniare domos, albergos e istruturas produtivas prevìdida dae su “Pranu domu” chi iscadit in santandria».