TIESI. Su disìgiu de libertade e su destinu de soledade de unu pitzinnu prodìgiu divènnidu una de sas mentes prus mannas de cada tempus sunt in intro de su romanzu de su giornalista e iscritore danesu Morten Brask, "La vita perfetta di William Sidis" (imprentadu dae Iperborea), chi, gioja su 13, at a èssere presentadu in sa Sala Sassu a sas 5,30 de borta de die. Su protagonista de su libru a degheoto meses leghet su New York Times, a bator annos imparat a sa sola su grecu e su latinu e a ses ammentat deretu cada libru chi isfògiat. De prus, faeddat deghe limbas e nd'imbentat una a nou (su vendergood) e, a pustis de àere iscritu òperas de matemàtica e de astronomia presentat, a ùndighi annos in Hravard, sa teoria sua in pitzu de sa de bator dimensiones. Ma est cundennadu dae sas matessi dodas suas a nch'èssere postu a banda de sa sotziedade. Creschet, difatis, che a "brulla de sa natura", pessighidu dae sos giornales, refudadu dae sos fedales e isfiadadu dae sas pressiones de su babbu psichiatra chi nde faghet un'ogetu de sos esperimentos suos e lu creschet curiosu pro cale si siat connoschèntzia. S'addòbiu, chi andat a manu tenta cun sas punnas culturales de s'amministratzione comunale tiesina, nch'est in intro de "Èntula", su fèstival literàriu peri sas biddas contivigiadu dae s'assòtziu Lìberos. At a èssere presente s'autore.