«Atapada tràgica: duos mortos in Ìtiri Cannedu». La Nuova aberit s'editzione de oe cun sa crònaca de un'intzidente in ue ant pèrdidu sa vida duos giòvanos. Àteros tres sunt ricoverados in s'ospidale.
Su giornale tataresu nos contat finas chi, in contu de tzerachias militares, «torrat a comintzare sa cuntierra». Leghimus chi «sas esertzitatziones comintzant a nou cando chi abarrant firmas sas tratativas pro sa minimada de sas bases in s'ìsula, cussas pro sas bonìficas e cussas in pitzu de s'impreu de sos benes militares».
Intre sas novas in prima pàgina meresset atentzione sa chi nos contat de su ministru Delrio chi, tràmite Facebook, narat chi sos sìndigos podent gastare su dinare pro sa re-costrutzione «lìberos dae su patu de istabilidade».
«Casteddu ispetaculare marcat tres retes a su Nàpoli». Custa est s'abertura de L'Unione Sarda finas cun belle binti rigas de crònaca. In sa segunda metade de sa pàgina sa serrada de sa presone de Buoncammino: «Sos 334 detenudos sunt istados tramudados eris in su penitentziàriu nou de Uta».
Non mancat s'editoriale in ue leghimus «cunsideros minores pro nàrrere chi su guvernadore Pigliaru diat dèvere renèssere a giagarare su gastu pùblicu e minimare sos dissipos». Pro s'opinionista «assùmere personale nou in s'Ente forestas e torrare a fraigare s'ospidale inùtile de Santu 'Engiu» sunt medidas chi no agiuant.