Su perìgulu chi in sa Lege de Istabilidade bèngiat introduidu s'aumentu de s'Iva pro su pellet b'est totu cantu. Sa Commissione Bilàntziu de su Senadu at difatis aprovadu un'emendamentu, presentadu su 13 de nadale, chi previdet su passàgiu dae s'atuale 10% a su 22%. Una cunfirma de custa medida in s'aprovatzione in àula diat àere cunsighèntzias deretas in sas butzacas de sos consumadores, a comintzare dae sos chi ant una prus minore capatzidade de ispesa: s'Iva, difatis, no est un'imposta progressiva e interessat a totus, sena cunsiderare sos livellos reddituales. E su de s'iscaldire no est unu vìtziu. Est a nàrrere, su pellet no est unu bene de lussu. Gasi su Guvernu chircat de prelevare 96 milliones de èuros. Si cunfirmat sa prassi chi connoschimus: si leat dae sos chi nd'ant prus pagu ca sunt sa majoria.