CASTEDDU. Sighit sa cumbata de su cussigeri banaresu Gavino Sale contra a s'istadu italianu chi «tentat de s'autoassòlvere dae sa responsabilidade de àere imbrutadu sos tretos a làcana de sos polìgonos de Chirra e Teulada, ponende duncas in perìgulu su protzessu de bonìfica pro more de s'ismànniu de su livellu de incuinamentu chi non diat prus classificare custas àreas che a zonas incuinadas». Est custa sa reatzione de iRS contra a su decretu guvernativu chi previdet una «valutatzione de sos tassos de incuinamentu in sas àreas de su demàniu destinadas a s'impreu esclusivu de sas fortzas armadas». Pro custu motivu su cussigeri Sale (primu firmatàriu) at presentadu un'interrogatzione pedende una valutatzione de sas cunsighèntzias de custu decretu subra su protzessu de bonìfica. Ma finas de sas motivatziones de su prof. Mariani chi at esclùdidu formas de incuinamentu ligadas a sas esertzitatziones. Pro Sale «bonificare e re-cunvertire cussos territòrios diat èssere su mìnimu chi su guvernu potzat fàghere».