SÌLIGO. «In ocasione de sas eletziones de su mese de maju de ocannu, proponimus sa creatzione de una lista tzìvica aberta a sas fortzas polìticas, sotziales e a sos tzitadinos interessados, cun sa punna de nche giùghere a su guvernu de sa Comuna unu grupu responsàbile e rapresentativu de sas dimandas de sa tzitadinàntzia». Est su chi ant iscritu sos militantes de su tzìrculu silighesu de su Partidu democràticu.

«Su prus mannu interessamentu» propostu naschet «dae s'esigèntzia de aunire sa benistàntzia de sos tzitadinos cun su cuadru istitutzionale nou de sas Uniones de sas Comunas e de sas funtziones, cun s'ispopulamentu de sas biddas minores, sas comunidades nostras chi imbetzant semper de prus e s'iscassidade de resursas finantziàrias».

Su tzìrculu, a dae chi b'at pagu tempus dae inoghe a cando s'at a votare, sutalìniat chi «amus totus cantos su dovere de fraigare unu caminu polìticu e unu programma pro sa legisladura chi benit avalorende sas cumpetèntzias, sa voluntade e s'impignu a cuncùrrere a su re-làntziu econòmicu e sotziale de sa comunidade nostra in unu panorama polìticu complicadu e chi est semper mudende·si».

«In custu cuntestu – si leghet in sos concruos de su comunicadu – su tzìrculu, cun sa punna de favorire su cunfrontu tzìvicu, si faghet promotore de una initziativa aberta a sas cumpetèntzias e a sas etzellèntzias chi Sìligo galu possedet. In sas dies imbenientes amus a ativare sas initziativas netzessàrias e sos cuntatos cun sas vàrias fortzas polìticas e sotziales tzitadinas pro collire e cumpartzire propostas conca a su fràigu, cun pagos puntos ma cuncretos, de unu progetu amministrativu modernu “In Comune” pro Sìligo».