Sas biddas de su Meilogu, che a totus sas biddas sardas, diant pòdere àere luego una solutzione a sos problemas de degradu e ispopulamentu, gràtzias a un'agiudu pro chie non resessit a àere una domo, a comintzare dae sas famìllias noas. S'idea naschet a su cossizeri barbaritzinu Efisio Arbau chi at presentadu unu emendamentu a s'iter legislativu (Dl 130) in contu de urbanìstica e edilìtzia. Sa proposta, giai isperimentada in àteros chirros de Itàlia, movet dae sa còmpora de s'edifìtziu (finas cadruddu) dae parte de sa Comuna a prejos simbòlicos. Cun sa Comuna matessi chi l'at a torrare a bèndere a chie lu cheret re-istruturare (còpias de giòvanos, turistas in chirca de ocasiones de investimentu etc...) dende, gasi, un'immàgine noa a sos tzentros istòricos. Sa Regione diat dèvere intervènnere pro mèdiu de agiudos in contu de crèditu e  de finantziamentos pro sa re-cualificatzione urbana de sos bighinados interessados.