In custa note funda
non bi moghet sisìa
ne istripitu 'e cantos codiaos.
Sa mente bagamunda
bolat arta, sidia
de lucores de chelos isteddaos,
chircande 'e tenner sinnos
fozios de amore e de carinnos.

Che alenu 'e bentu
in pupias serente
mi colas ma disizu non m'apentas.
Nen pache e ne alentu
apo prus in sa mente
ca in su pessu meu non t'assentas:
ses inoche e in cue
ma pro me non t'arressas in neddue.

Sos manzanos rasande
in su sentiu fritos
m'arbeschen sudorande ghiddighia.
...M'ischido disizande
sos ocros tuos fitos
ch'intro su coro prender los cheria
chin filu 'e seda e buda
pro los mirare, semper, a sa muda...

Paso su pessamentu
in nues de bambache
ninniàndel'in bàntzicos de luna
a sàgadas d'ammentu
e tintinnos de pache...
Iscontande sas dies, un'a una,
de s'anima in ja janna
t'iseto che lentore in sa sicanna...

Primo premio ex aequo alla XVII edizione del “Prèmiu Seunis”