Con questa "cantone" il poeta banarese prese in giro la credulità popolare dei suoi compaesani convinti che nei pressi del santuario di N.S di Cea vi fosse un tesoro nascosto. L'opera è del 1928

I

Pòveros acudide a su siddadu,
acolla s'ora de bos irricchire:
ja b'at dinari, devides ischire,
in sas giorras limidu e ruinzadu
ca tantu su 'inari sueradu
faghet lestru a bintrare e a bessire.
Cust'est cosa chi mai at a finire
proite est Deus chi l'at mandadu.
Pòveros acudide a su siddadu...

II
Pregade totu, mannos e minores,
chi 'enzat sa fortuna coitende.
Ja bi sun sa fide trabagliende
unu pastore e duos tzapadores
cun pérduas, fadigas e suore
e duas santas fèminas preghende
a rosàriu in manu e pianghende
che chi b'esserat su mortu interradu.
Pòveros acudide a su siddadu...

III
Custas chi pregan sun duas batias
bellas e friscas che rosa in sa mata.
Solu Nostra Signora est ch'est ingrata
e non intendet sas pregadorias
ne poden agatare sas labias
chi sun pienas de oro e de prata
però si sun giurende a rughe fata
chi an tres iscalinas agatadu.
Pòveros acudide a su siddadu...

IV
B'ana fatu unu fossu a giru tundu
chi paret unu putu 'e miniera
tribagliende e fatende preghiera
pro nde 'ogare s'oro dae fundu
chi si l'aciapan irrichit su mundu
e-d-est onore a sa Sardigna intera:
tando faghimus totu arte lezera
e semus ricos e postos in gradu.
Pòveros acudide a su siddadu...

V
E cantas dies e notes metzanas
b'an passadu in ierru e in beranu
cun lampione e candelas in manu
fatende fossos  istampas e tanas
e b'an intesu fina sas campanas
sonende suta terra su manzanu
chi bi cheret coraggiu e corpus sanu
a bider cantu an bidu e tocadu
Pòveros acudide a su siddadu...

VI                        
Si sun postos cun cabu e cun coa
sos chi trabaglian e sentz'ingannia.
E si l'agatan a Santa Maria
nachi li faghen una cheja noa.
Si resessin a fagher cussa proa
Ch'amus mezoros de ogni zenia
poi bi faghen una ferrovia
pro ch'imbarcare su chi nd'an bogadu.
Pòveros acudide a su siddadu...

VII
Da inie deretu a Portu Conte
partit in trenu su 'e imbarcare.
S'àteru in bidda lu lassan istare
ca cussu a sas ispesas faghet fronte
antzis sos camasinos de su monte
sun preparados pro los impreare.
Su chi non b'istat l'an a collocare
in chentinas e domos de ogni gradu
Pòveros acudide a su siddadu...

VIII
Si resessimus a l'àere in manu
semus ricos e totu benistantes.
Non bi det àere pius emigrantes
andende a sos terrinos africanos
e finamenta sos americanos
ricos, miliardarios e braciantes
cun coratzadas e idrovolantes
acudin totu a su signale dadu
Pòveros acudide a su siddadu...
                        
IX
Como chi l'at ischidu su retore
bisonzat su dissignu a cambiare
ca dividin cun isse a mes'a pare
cantu b'at de richesa e de valore
e l'an a fagher amministradore
de su 'inari chi nd'an a bogare
ca si lu 'ogan sentza nde li dare
ruen in sacrileggiu e in pecadu.
Pòveros acudide a su siddadu...
                                    
X
Si sa Cheja su mesu nd'at pretesu
su tertzu a su Guvernu, chi est rejone.
Igue bi sutzedit chistione
dividéndelu a litros e a pesu.
E chie at tribbuladu e b'at ispesu
diat cherrer sa mezus purtzione,
antzis pro s'atu 'e sa divisione
b'an finas su notàriu jamadu.
Pòveros acudide a su siddadu...
                             
XI
Poi cumprida s'operatzione
b'an a fagher de marmaru un'insigna
pro custa zente ch'est bistada digna
de grande fama e ammiratzione
e b'an a benner in protzessione
totu sos munsegnores de Sardigna
pro distruire dogn'umbra maligna
e beneigher su logu tentadu
Pòveros acudide a su siddadu...          

XII
Bànari, imbidiadu e fortunosu
ses pro custa novella improvisada.
Tue ses terra nòbile e amada,
tue ses paradisu gloriosu
inue tenet su dultze reposu
sa zente chi fit prima isconsolada.
Pro totu est sa fortuna preparada,
a mie solu est ch'as irrediadu.
Pòveros acudide a su siddadu...