Rimani sempre aggiornato sulle notizie di meilogunotizie.net
Diventa nostro Fan su Facebook!

Tiesi: intrende in sa festa cun màndigos e càntigos

| di Mauro Piredda
| Categoria: Arte
STAMPA
printpreview

TIESI. Sa festa de Seunis est a proa a comintzare. Ma in antis de issa sa Pro Loco at organizadu duos addòbios de importu pro mantènnere bia sa traditzione tiesina in duos cuntestos diferentes, mancari chi ligados a pare: su màndigu e su càntigu.

Mèrcuris su 3 de cabudanni est su die de sos “Macarrones a ferritu”, sos chi si faghiant in istiu, a mesaustu e a Nostra Segnora, paris cun sos cicioneddos. In antis los cundiant cun bagna de puddighinu. Pro los ammaniare sa Pro Loco at detzisu de impitare su trigu sardu Capelli. A pustis de s'assàgiu at sighire sa chena (a sas 8 de sero in sa sede de sa Pro Loco).

Sàbadu su 6, imbetzes, at a èssere presentadu su discu chi at a regollire totus sos "Cunsonos de Tiesi". Cunsonu (che a Cuntratu in Sèneghe, Taja in Àggju, Hussertu in Mamujada e Cuncordu in Fonne) est su nùmene locale pro su tenore. In Tiesi sos cunsonos sunt su “Tiesinu”, su “Santu Juanne” e su “Nostra Segnora de Seunis” e totus cantant sa chi est una particularidade chi niune àtere faghet: est a nàrrere sa “maestralina”, chi in su cd at a èssere presente finas in una versione pesada dae Andria Nìnniri. In s'addòbiu (chi at a comintzare a sas 6 de sero in sa sala Sassu) b'ant a èssere finas sos de Àggju e de Sèneghe chi ant a faeddare de sos modos de cantare issoro. S'at a faeddare de assimìgios e diferèntzias intre "maestralina" tiesina e "istudiantina" seneghesa. Su discu at a èssere presentadu dae s'espertu Andria Deplano e Pàulu Pillonca at a faeddare de su ligòngiu intre càntigu a tenore e poesia.

Mauro Piredda

Contatti

redazione@meilogunotizie.net
mob. 389.8213416
Accedi Invia articolo Registrati
Cittanet
Questo sito utilizza cookies sia tecnici che e di terze parti. Continuando la navigazione acconsenti al loro utilizzo - Informativa completa - OK