GIAVE. S'assòtziu culturale “Antonino Uras” at ammaniadu sa de ùndighi editziones de su calendàriu in limba sarda. Pro sa prima borta imprentadu “a colores” (boghende·nde a campu sos giogos pitòricos de sos acuerellos de sa presidente de s'assòtziu Maria Antonietta Uras), ponet in evidèntzia sas dies nòdidas e sas lunas chi serbiant a sos antigos pro acumprire a sos traballos de su sartu. In intro de su calendàriu sunt duas sas figuras pintadas: sa crèsia giavesa de Santu Andria apòstolu e sa de Nostra Segnora de Cabu Abbas in su sartu turalvesu. B'at finas una poesia de Ernesto Nuvoli (“A tiu Antoninu Uras”) chi in su 2004 aiat leadu parte a su memoriale intituladu a su poeta giavesu e, a pustis, publicada in su libru imprentadu dae s'assòtziu (sa poesia est istada retzitada in intro de sa festa de Santu Antoni su 17 coladu). Su calendàriu at èssere dadu in donu a totus sas Comunas, sos assòtzios e sos tzìrculos culturales chi l'ant a pedire a s'assòtziu “Antonino Uras” iscriende a ass.cult.uras@tiscali.it, a sa sede de Corso Repubblica 121 o telefonende a su nùmeru 079/869005.