Nos at lassadu oe su grandu istòricu frantzesu Jacques Le Goff. Aiat norant'annos. Sa nova l'at dada custu mangianu su giornale pariginu “Le Monde”. Nàschidu in Tolone in su 1924, Le Goff est istadu unu de sos prus mannos istudiosos de sa sotziedade otzidentale de s'edade mesana. A pustis de àere istudiadu in s'“Ecole normale superieure”, in su 1954 est istadu numenadu professore in sa facultade de Lìteras de s'universidade de Lille. Chircadore dae su 1958 in su “Centre nationale de la recherche scientifique” in Parigi, dae su 1972, e pro chimbe annos, s'istòricu at dirigidu sa de ses setziones de s'“Ecole pratiques des hautes etudes”. Intre sas òperas suas in italianu agatamus La civiltà dell'Occidente medievale (Einaudi), Il tempo sacro dell'uomo (Laterza), Lo sterco del diavolo. Il denaro nel Medioevo (Laterza) e Il Medioevo. Alle origini dell'identità europea (Laterza). Pro s'istòricu mesuloghesu Giuanne Deriu «cun Le Goff s'edade mesana no est istada prus sa matessi. Est a nàrrere chi non est istada sa matessi de s'iscuridade. Gràtzias a sos traballos suos, difatis, s'edade mesana si mustrat comente sa madrighe de sa modernidade nostra».