S’Ufìtziu Linguìsticu de sa Limba Sarda e Catalana de su Servìtziu Limba Sarda de s’Assessoradu Regionale a s’Istrutzione Pùblica sighit a ammaniare in Tàtari sas presentadas de “Limba e libros in su Museu Sanna”.
Su de duos apuntamentos est  giòbia su 3 de abrile, in sa sala cunferèntzias de su Museu Natzionale “A. Sanna”, in carrera de Roma a sas chimbe e mesu de sero. At a èssere presentadu su libru “Istòria de unu cau marinu e de su gatu chi l’aiat imparadu a bolare”, publicadu dae Papiros e traduidu dae Diegu Corràine, chi est sa versione in sardu de s’òpera de Luis Sepùlveda “Storia di una gabbianella e del gatto che le insegnò a volare” .
Sas initziativas, fatas cullaborende cun su Ministèriu pro sos Benes e sas Atividades culturales, sunt parte de una filera de eventos chi su Servìtziu Limba sarda regionale est promovende dae medas annos pro valorizare sa limba sarda e sas variedades alloglotas de Sardigna.
A pustis de sos saludos de Gabriella Gasperetti, diretora de su Museu, Cristiano Bècciu, de su Servìtziu Limba sarda, at a abèrrere sa presentada. Ghiat sa dibata Istèvene Ruiu de s’Ufìtziu linguìsticu regionale. At a èssere presente Diegu Corràine, su tradutore e editore.
Traduende su contu de Sepùlveda est a dare ondra a su sardu e, a su matessi tempus, est a fàghere a manera de acurtziare letores medas  a sa limba pròpia pro mèdiu de tradutziones de òperas nòdidas de sa literadura internatzionale.
Una faina de importu finas pro s’iscola ca in custa manera si produent materiales didàticos e literàrios de livellu artu pro los pòdere consultare e impreare in s’atividade iscolàstica fitiana.
Diegu Corràine, istudiosu de limba sarda chi faghet parte de s’Osservatòriu regionale, est editore, tradutore e diretore de su mensile “Eja”.
Sos apuntamentos imbenientes de s’initziativa "Limba e libros in su Museu Sanna" sunt pro su 10 de abrile  cun sa presentada  de "Les mies mans", libru de poesias de Antoni Canu, editziones Nemapress e giòbia s’8 de maju cun sa presentada de “S’istrumpa” cun s’autore Piero Frau.