BORUTA. In mesu de sas initziativas chi punnant a afortire sas limbas de minoria, fartant mescamente sas chi istùdiant s'impreu issoro in sa comunicatzione a livellu “artu” comente est sa sièntzia. Sas limbas de minoria, tando, sunt acorradas a s'impreu de domo, de famìllia e de comunidades minores. In totus sas limbas de un'istadu comente in sas limbas de minoria b'at sa chistione de sestare limbàgios, introduire e ammodernare tèrmines chi iscant afrontare sos temas noos ispetzìficos chi essint a campu in su mundu de sa sièntzia e de sa tècnica. In sas matèrias umanìsticas e in sa literadura sua, su significu e su valore semànticu de una paràula càmbiat cun sa sugetividade de un'autore; in sas limbas de minoria sa partzidura in faeddos locales e sa mancàntzia de un'istandard linguìsticu de riferimentu giughet a unu isminorimentu semper prus forte de su campu semànticu de una paràula, serrende·la in microàmbitos locales perdende gasi su podere de comunicare. Pro s'isvilupu de unu limbàgiu sientìficu bi cheret sa chirca de tèrmines unìvocos chi tèngiant su matessi significu in totu sa comunidade iscientìfica, locale e globale. Pro custa resone sa terminologia sientìfica, in cale si siat limba neolatina, anglosassone, germànica, islava o de àtera genia, impreant tèrmines de derivatzione grega o latina. Dae paritzos annos sa fundatzione Smirg, paris cun s'atividade de chirca e de formatzione in su campu de sa diagnòstica a immàgines, est impinnada, pro istatutu, a iscambiare informatziones sientìficas pro mèdiu de sas limbas minoritàrias de Sardigna (sardu e catalanu) paris cun s'inglesu e s'italianu.  

PROGRAMMA
h 8,30 - Saludos de sos organizadores
h 8,45 - Pro una polìtica linguìstica in Sardigna >Pepe Corongiu
h 9,15 - Literadura umanìstica e sientìfica in sas limbas de minoria >Diegu Corraine
h 9,45 - Paràulas e tèrmines in meighina : esperièntzia de sa Fundatzione SMIRG >Pitzente Migaleddu
h 10,15 - Pasu e cunfrontu
h 10, 45 - Limbàgios tècnicos e sièntificos in sa limba catalana >Jordi Bover, diretore de TERMCAT (Tzentru de terminologia catalana), Catalugna
h 11, 15 - Limbàgios tècnicos e sientìficos in sa limba Friulana >Marzio Strassoldo, presidente de sa “Societât Sientifiche e Tecnologjiche Furlane”
h 11, 45 - Problemas e solutziones: esperièntzias a cunfrontu >Pepe Corongiu, Diegu Corraine, Pitzente Migaleddu, Emilio Usula
h 12,45 concruida