Bonas dies e bonu comintzu de chida a totus sos chi nos sighint. Sa bìnchida istòrica de sa Dinamo de Tàtari in sa finale de "Supercoppa" contra a sos milanesos de s'Armani est sa nova cumpartzida dae sos giornales sardos oe in edìcola.

Ma si est foto-notìtzia in La Nuova (chi de su restu est unu giornale tataresu e oe nos contat de sa festa in tzitade pro custa bìnchida), in L'Unione amus a maduru sa crònaca cun s'intzidente istradale in Cuartu: «Graves duos amorados. Foras de istrada in sa 131 dir, s'àuto si bortulat».

S'editoriale oe est firmadu dae Beniamino Moro e nch'intrat deretu in sa lìnia de polìtica econòmica de su guvernu Renzi: «Sa torrada a sa crèschida, in sos faeddos de su ministru de s'economia at a èssere su motivu ispiradore de sa lege chi s'at a formare in sas dies imbenientes [...]. Semper e cando b'at milli modos pro propònnere s'obietivu, ca s'istrategia impreada [...] faghet nàschere dudas medas».

Su ligòngiu a un'artìculu internu, in ue Soru narat chi a su Pd «serbit unu progetu colletivu» est imbetzes collegadu a s'editoriale de La Nuova de Andrea Sarubbi («Sa calada istentosa de s'ùrtimu partidu»): «No est de badas chi Pd e Fi chistionent de forma partidu e mèngua de sos iscritos. Est unu protzessu dèvidu a bator cajones: sos sèberos de sas ghias, sa tàtica de sas minorias internas, sa personalizatzione de sa polìtica, su mudòngiu de sa sotziedade».

Galu, L'Unione antìtzipat s'intervista (in segunda pàgina) a su presidente de Legambiente in pitzu de  su decretu “Sblocca Italia”: «si tzentralizant sos sèberos, si ispòderant sas Regiones». La Nuova nos contat imbetzes de sa manifestatzione nugoresa de sas “sentinellas” contra a sos deretos de sos omosessuales.

In fines (mancari chi belle cuada) s'inchesta de L'Unione in pitzu de «Trenitalia in fua dae sa Sardigna».