«Crisi, bilàntziu regionale in arriscu» est su tìtulu printzipale in sa prima pàgina de La Nuova Sardegna oe in edìcola, chi sighit gasi: «S'assessore Paci: mìnimant sas intradas de Ires e Iva, bucu de 400 milliones in sa Sanidade». Si pro su chi pertocat Ires e Iva sa neghe est de sa crisi chi si rifletet in sa produtzione e in sos consumos, pro sa Sanidade Paci mustrat sa solutzione: «Amus a dèvere aorrare de prus e in antis de totu minimare sos gastos sanitàrios».

In s'ìnteri paret chi risorsas non nd'apat arribadu pro su disacatu de s'annu coladu: «Terranoa, abarrat su perìgulu alluvione. Un'annu a pustis. Giovannelli: "Dae s'Istadu peruna risorsa"». Su Sìndigu de Orosei annanghet: «Timo àteros disacatos. Sa burocratzia arreat totu».

In sas crònacas s'inchesta in pitzu de sa morte in presone de su tzitadinu aligheresu Francesco Saverio Russo e duos rinvios a giudìtziu pro su secuestru de su bonolvesu Titti Pinna.

Galu, sa Qatar Foundation («Bastat, fraigamus nois s'ospidale») e su Santu Rafaelle in Terranoa e sos «nodos galu de isòlvere» in pitzu de sa chistione de sos Gigantes de Mont'e Prama e de sa cooperativa emiliana Archeosistemi chi diat dèvere pònnere in òpera sa campagna noa de iscavos.

In agabbu de pàgina crònaca isportiva pintada de ratzismu. «Bae a mandigare bananas»: custu at dèvidu intèndere su giogadore senegalesu de s'iscuadra de fùbalu de La Trinitai Fail Cheiwhna Cheiwh gioghende contra a su Pèrfugas.

L'Unione Sarda aberit cun su foto-voltàicu e cun s'«Autogol de sa Regione» chi at fatu recursu «contra a su Tar chi aiat botzadu sas serras» e, a minudu, cun sa crisi finantziària in regione «130 milliones in mancu pro neghe de sa crisi».

A manca s'editoriale in pitzu de su Ppr e, mesches, de sas decraratziones de Francesca Barracciu (chi aiat naradu chi su de Soru fiat "manicheu"), mancari chi non siat nemmancu mentovada.