Sa donatzione de sos òrganos, e gai etotu sa de sos tessutos e de su sàmbene, in prus de èssere una testimonia de impignu tzìvicu individuale, rapresentat una manifestatzione de giudu in sos cunfrontos de sa sotziedade intrea e de sos chi nd'ant bisonzu. S'amministratzione comunale banaresa at mòvidu dae custos cunsideros pro acumprire a sa possibilidade introduida dae sa lege 25/2010. Est a nàrrere: «Sa carta de identidade podet cuntènnere sos inditos de su cunsensu, o de su refudu, a donare sos òrganos in casu de morte».

Pro custu motivu sìndigu e assessores ant deliberadu a s'unanimidade pro ativare sas protzeduras netzessàrias a cunsentire s'espressione de custa voluntade. Su responsàbile de s'ufìtziu Anàgrafe, cando sos tzitadinos s'ant a indiritzare a isse pro rechèdere su documentu (o pro l'annoare), at a dèvere frunire totus sas informatziones pro permìtere custa possibilidade. Sa manifestatzione de voluntade at a èssere finas comunicada a su tzentru natzionale trapiantos pro nch'èssere inserida in su sistema informativu (Sit).