Gioja su 12 de martzu in Casteddu, a sas 10,30 de manzanu, b'at a àere una manifestatzione contra a su pranu regionale de dimensionamentu iscolàsticu cunvocada dae sas Comunas interessadas de sa provìntzia de Tàtari. S'assessore de s'Istrutzione pùblica, Claudia Firino – in s'addòbiu de su 5 coladu cun sos sìndigos – at naradu (a su chi leghimus in su comunicadu de sa Comuna de Cossoine) chi «barigare sas pluriclasses est unu sèberu polìticu e istratègicu de s'assessoradu e de sa Giunta regionale, ma a livellu provintziale tataresu carchi cosa no at funtzionadu traballende cun sos nùmeros e non in subra de s'elaboratzione de sos polos iscolàsticos territoriales». Sas Comunas de Sìligo e Cossoine, pro su 12, ant a pònnere a disponimentu unu postale. Su 16 sos 29 sìndigos s'ant a addobiare in Tramatza pro detzìdere ite fàghere in sas dies chi ant a bènnere.