Concruidu su primu addòbiu intre sa Regione, s'Anci e una delegatzione de sos sìndigos de sas Comunas chi, como chi est como, non faghent parte de s'Àmbitu territoriale otimale e chi, a su matessi tempus, no ant aderidu a su gestore ùnicu Abbanoa. Resturtu de importu est su chi pertocat sas ùndighi Comunas montanas chi ant una populatzione chi no arribat a sos milli abitantes. De custas ùndighi tres sunt de su Meilogu: Bessude, Cherèmule e Sìligo. A su chi narat s'assessore regionale de sos Traballos pùblicos Paolo Maninchedda «sas amministratziones locales no ant a àere perunu problema a mantènnere una gestione autònoma de sa resursa ìdrica e sa Regione las at a acumpangiare in custa esperièntzia chi, pro su restu, est prevìdida dae sa lege». Sas àteras oto comunas sunt Urtei, Anela, Su Burgu, Isporlatu, Mòdolo, Bòtidda, Adoni e Ortzai. Mèrcuris coladu, s'11 de martzu, b'at àpidu una protesta de sas Comunas interessadas in Casteddu.