BÀNARI. Inghiriada dae s'istima e dae sos carignos de sos fizos, de sas nuras, de sos nebodes e de sas netas, tia Rosa 'Etzu at festadu oe sa lòmpida a su traguardu de sos 100 annos. Fiza de Frantziscu 'Etzu e de Giuanna Maria Fadda, tia Rosa est nàschida su 27 de cabidanni de su “Anno Domini millesimo nongentesimo decimosexto”. In su 1940 s'at cojuadu a tiu Michelinu Piredda (mortu in su 1988) donende·li tres criaduras. Pro s'ocasione, don Ziròminu Derosas l'at dispostu una missa istrinta, in domo sua matessi, torrende·li sas gràtzias pro sa fide sua e pro àere acumpagnadu in custos annos sos parentes suos in su caminu de custa vida.

Su nebode Ànghelu Porcheddu, poeta famadu, l'at donadu custu sonete

Banari oe, cun amore 'e mama
che fiza onora a tia 'Ezzu 'e Rosa
c'hat istudadu a s'edade dicciosa
de sas chentu candelas sa fiama.

In sinu tou hat tèssidu sa trama
de custa vida: serena e...umbrosa,
e che muzere e mama virtudosa
de sabiesa merèssit sa prama.

In su caminu longu 'e sos chent'annos
hat supportadu istragos e fatiga
in chertu cun dolores e cun dannos.

Ma cun sa fortza e volontade antiga
hat affrotadu e bintu sos affannos
lassende onesta e lìmpida s'istiga.

Sigat ancora in sa cussorza aprìga
pro àteros beranos chena ingannos,
e bestida de seculares pannos
sa bona sorte li riat amiga
e ancora messet s'indorada ispiga
de pagh'e amore e de carignos mannos