TURALVA.  Sàbadu su 27 de nadale in su Tzìnema “Carlo Felice” de Turalva, a sas 6 de sero, Sarvadore Serra at a presentare sos libros “Dubliners” de James Joyce e “The Canterville Ghost” de Oscar Wilde in sa versiones sardas bortadas dae isse etotu. “Dublinesos” e “Su pantasma de Canterville” sunt duas òperas chi non podent mancare in sas bibliotecas de su Meilogu e in sa libreria de sos amantiosos de sa literadura istràngia e de sa limba sarda. Ambos libros, editados dae Papiros, faghent parte de sa collana “Sena làcanas” in ue agatamus finas sas tradutziones (in limba sarda comuna) de Goethe, Stevenson, Sepùlveda, Garcia Marquez, Saramago e àteros. In s'addòbiu de Turalva, in prus de Serra, b'ant a èssere su Sìndigu Giuanne Uras pro sos saludos, Fabio Solinas de Àndala Noa chi at a introduire e s'operadore linguìsticu Mauro Piredda chi at a lèghere unas cantas pàginas de sas òperas presentadas.