Rimani sempre aggiornato sulle notizie di meilogunotizie.net
Diventa nostro Fan su Facebook!

Pluriclasse de Sìligo, babbos e mamas istratzant sas iscritziones pro ocannu chi benit

| di Mauro Piredda
| Categoria: Territorio
STAMPA

SÌLIGO. Sighit sa cuntierra contra a su Pranu regionale in contu de iscolas pluriclasse.

Custu manzanu sos babbos e sas mamas de Sìligo, cun su sustegnu de s'Amministratzione e de sa tzitadinàntzia intrea, ant ocupadu a manera simbòlica sas iscolas elementare de sa bidda.

In sa manifestatzione sunt istadas istratzadas sas domandas de iscritzione pro ocannu chi benit. De nche giùghere sos pitzinnos a Tiesi, babbos e mamas silighesos non nde cherent ischire. E finas sos minoreddos ant sas ideas craras. Issos etotu ant manifestadu cun una lampadina: “All'assessore per un'idea migliore”, ant naradu in sintonia.

Essende finas mama, at leadu sa paràula su sìndigu Giuseppina Ledda: «Sa tratativa intre sìndigos e Regione no est andende a in antis. In cara de s'ennèsima rechesta de incontru indiritzada a su presidente Pigliaru no amus galu àpidu risposta. Nos at ignoradu. Pro custu motivu, nois sìndigos de sas 29 Comunas interessadas, nos amus a addobiare custu martis in suta de su palatzu de sa Ras».

Ma sa batalla de Sìligo est finas sa batalla de Francesca, una pitzinna de sete annos chi est diabètica dae cando nd'aiat duos. Gasi sa mama Barbara: «Cun s'iscola in Sìligo apo sa serenidade chi bi cheret ca poto intervènnere in cale si siat momentu. Francesca non bi la faghet a sa sola: non leat sas meighinas e non si mesurat sa glitzemia. Deo etotu ando tres bortas sa die a iscola ca sa pitzinna sufrit de malores ipoglitzèmicos fitianos. Comente dia fàghere si mi nche la giughent a Tiesi? In cue issa non diat àere assistèntzia fissa».

S'arrenegu de Barbara est finas contra a «s'indiferèntzia de sa Regione»: «Est prus de duos mese chi chirco una lìnia de comunicatzione cun s'assessore Firino, ma nudda. Gasi etotu cun su presidente Pigliaru. No apo àpidu peruna risposta».

«Isperemus chi nos iscurtent – at concruidu su sìndigu – finas ca sa delìbera finale no est istada adotada dae issos. Totu custu abbolotu lu semus pesende pro chi sos de sa Regione leent in cunsideru a su nessi su perìodu de pròroga chi lis amus pedidu, est a nàrrere unu annu iscolàsticu. Gasi si diat pòdere torrare a arresonare totus paris».

Mauro Piredda

Contatti

redazione@meilogunotizie.net
mob. 389.8213416
Accedi Invia articolo Registrati
Cittanet
Questo sito utilizza cookies sia tecnici che e di terze parti. Continuando la navigazione acconsenti al loro utilizzo - Informativa completa - OK